Plantun de Prouvènço

Pèr coumpara dos planto d'encò nostre

Carex pairae & Potamogeton natans

Erbo-taienco

Carex pairae

Cyperaceae

Autre noum : Queirello(-de-Paira).

Nom en français : Laîche de Paira.

Descripcioun :
L'erbo-taienco trachis dins li prado umido e àutri relarg bagna de basso mountagno. Autramen èi pulèu raro. Douno d'èr à Carex spicata, emé l'espigueto de dessouto proun desseparado de l'enflourejado (1 cm). Li fueio fan de 2 à 3 mm de larg emé uno lengueto courteto, la racino coupado èi bruno. S'atrovon de 4 à 7 espigueto sus l'enflourejado noun ramificado que fai de 1 à 3 cm.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60(80) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 1 à 3(4) cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à avoust

Liò : Prado umido - Camin - Pelouso - Óuriero de bos
Estànci : Mesoumediterran à Mountagnard
Couroulougi : Éurasiatico
Ref. sc. : Carex pairae F.W.Schultz, 1868 (= Carex muricata subsp. lamprocarpa Celak., 1879 )

Espigo-d'aigo(-nadant)

Potamogeton natans

Potamogetonaceae

Autre noum : Poutamot.

Noms en français : Potamot nageant, Epi d'eau.

Descripcioun :
L'espigo-d'aigo-nadant es uno planto devengudo raro en Prouvènço. Trachis subretout dins lis aigo frejo e pulèu claro que soun pas mouvadisso o peréu en ribo d'aigo. Se recounèis majamen à l'articulacioun de soun pecou emé la fueio que fan un angle, au contro de Potamogeton nodosus (fueio de surfàci). Li fueio que soun dins l'aigo, tóuti en long, soun proun grando, fin qu'à 40 cm.

Usanço :
D'ùnis espigo-d'aigo sarien manjadisso en Asìo.